ഞാനൊരു മൊബൈൽ ഫോണാ-
ണാരുമേ ഗൌനിക്കാതീ -
യൂണുമേശമേലേറെ
നാളായിക്കിടപ്പല്ലോ
ആരാണു ചാരത്തെത്തി-
യാക്ക്റ്റിവയ്റ്റാക്കുന്നതു-
മാരാണെൻ മൌനങ്ങളെ
തൊട്ടുണർത്തീടുന്നതും
സ്മാർട്ടു ഫോണാണത്രേ,ഞാ-
നെല്ലാരും പുകഴ്ത്തുന്നു
സ്മാർട്ടാകാൻ മാത്രം യോഗം
വന്നതില്ലിതേവരെ
എനിക്കുവേണ്ടേ ഇന്റർ -
നെറ്റുമായ് സഹവാസ-
മെനിക്കുവേണ്ടേ ഗൂഗിൾ -
ക്രോമിന്ടെയാശീർവാദം
വാട്ട്സാപ്പു വേണ്ടേ ബ്ലോഗും
ഫേസ് ബുക്കും ട്വിറ്റെർ പോസ്റ്റും
ചാറ്റിങ്ങുമോൺലൈനിങ്ങും
യൂട്യൂബിൻ പാട്ടും വേണ്ടേ
ലൈക്കുകൾ കമന്ടുകൾ
സ്മൈലികളടിക്കണ്ടേ
വാർത്തകൾ ഷെയർ ചെയ്യാ-
നാദ്യന്തം നിന്നീടണ്ടേ
സ്നേഹസന്ദേശങ്ങൾക്കു
മദ്ധ്യവർത്തിയാകണ്ടേ
മോഹസല്ലാപങ്ങളാ-
ലുള്ളം കുളിർപ്പിക്കണ്ടേ
ജീപ്പിയസ്സണിഞ്ഞിട്ടു
നേർ വഴി കാട്ടീടണ്ടേ
കൂട്ടുകാരേപ്പോൽ ഞാനും
സെൽഫികൾക്കൊരുങ്ങണ്ടേ
ഞാനൊരു മൊബൈൽ ഫോണാ-
ണാരുമേ ഗൌനിക്കാതീ
യൂണുമേശമേലേറെ
നാളായിക്കിടപ്പല്ലോ
ആരൊന്നു വന്നിട്ടെന്നിൽ
ജീവചൈതന്യം ചേർക്കും
ആരൊന്നു കനിഞ്ഞിട്ടി-
ന്നെന്നെ ഞാനാക്കിത്തീർക്കും?
********************
No comments:
Post a Comment