Friday 15 September 2017

ബലിക്കാക്ക

സഖാക്കളോടൊത്തുപറക്കുമ്പോള്‍ കൂട്ടം-
പിഴച്ചുവന്നെത്തി നഗരവാനത്തില്‍ 
പരിഭ്രമിച്ചുപോയ്, മനുഷ്യരുമൊപ്പം
പെരുത്തവാഹനത്തിരക്കും കണ്ടഞാന്‍

പരിചിതമല്ലാതുയരുമൊച്ചകള്‍
നിരന്തരംകേട്ടു പതറിപ്പോയിഞാന്‍ 
പൊരുത്തപ്പെട്ടുപിന്നതുമായ് വേഗത്തില്‍ 
വിശപ്പും ദാഹവും വയറെരിക്കവേ 

പശിമാറ്റാനെന്തുതരപ്പെടുമെന്നായ്
നിനച്ചലയവേ, വഴിവക്കില്‍കണ്ടു
ജനമൊളിഞ്ഞുവന്നെറിഞ്ഞമാലിന്യ-
മലതന്‍ചാരത്തായൊരു നായക്കൂട്ടം

ഇടംകണ്ണിട്ടൊന്നുപറന്നിറങ്ങവേ,  
വിവിധമായ്കണ്ടു വിശിഷ്ടഭോജ്യങ്ങള്‍
വട,ദോശ,പൊറോട്ടതന്‍കഷണങ്ങള്‍,  
ബിരിയാണി,മാംസക്കറിതന്‍ശിഷ്ടങ്ങള്‍ 
രസിച്ചു,മൃഷ്ടാന്നമശിച്ചു,തുഷ്ടനാ-
യൊരുപുരപ്പുറത്തിരുന്നുറങ്ങിഞാന്‍
പലനാളങ്ങനെ പറന്നുചുറ്റി ഞാന്‍ 
പലേടത്തുംചെന്നു,പലതുംതിന്നുഞാന്‍ 

ഇവിടെയിങ്ങനെ സുഖമായ് വാഴുമ്പോള്‍ 
വരേണമോ നാട്ടിന്‍പുറത്തു വീണ്ടും ഞാന്‍ ?
ഒരുതരിയുപ്പോ,മുളകോചേര്‍ക്കാത്ത 
പകുതിവെന്തൊരാ-ബലിച്ചോറുണ്ണുവാന്‍ ?

*********    

Monday 28 August 2017

റേഷന്‍കാര്‍ഡ്

റേഷന്‍കാര്‍ഡു കൊടുക്കുന്ന 
ക്യൂവില്‍ നില്‍ക്കുകയാണു ഞാന്‍ 
നൂറുപേരതിലും മേലായ്
നില്പൂ മുന്‍പിലപേക്ഷകര്‍

തൊട്ടുപിന്‍പില്‍ മൊബൈല്‍ഫോണില്‍ 
തോണ്ടിനോക്കുന്ന സുന്ദരി 
മട്ടുംഭാവവു മേതാണ്ടു
മടുത്തിട്ടൊരുമാതിരി, 

നിന്നു,കാലുകഴയ്ക്കുന്നു
വരിമുന്നോട്ടുനീങ്ങിലും 
വന്നൊടുക്കമെനിക്കൂഴം
ഞാനപ്പോള്‍ കൃതകൃത്യയായ് 

നൂറുരൂപ, പഴങ്കാര്‍ഡില്‍
വെച്ചു വേഗംകൊടുത്തവാര്‍ 
ഒപ്പിട്ടുവാങ്ങി പുത്തന്‍കാര്‍-
ഡതുമായ് വിരമിക്കവേ 

പിന്നില്‍നിന്നുനിലത്തെന്തോ 
വീണപോലൊരു കമ്പനം 
ഞെട്ടിത്തിരിഞ്ഞുപോയ്‌,കണ്ടി-
ട്ടന്തംവിട്ടങ്ങുനിന്നുപോയ് 

വെട്ടിയിട്ടമരംപോലെന്‍ 
വയ്യേനിന്നമനോഹരി 
ബോധമറ്റുകിടക്കുന്ന
കണ്ടെത്തീചുറ്റുമാളുകള്‍ 

തൊട്ടുപേരുവിളിച്ചിട്ടും 
വെള്ളമിറ്റിച്ചുവീഴ്ത്തിലും 
മിഴിയൊന്നുതുറന്നീലാ 
വൈവശ്യംചേര്‍ന്നപെണ്‍കൊടി 

ആംബുലന്‍സിന്നുപോകേണോ
ബന്ധുക്കളെ വിളിക്കണോ 
എന്തെന്തുചെയ്യുമെന്നോര്‍ത്തി-
ട്ടെല്ലാരുംകൂടിനില്‍ക്കവേ 

സുന്ദരിക്കുട്ടിതന്‍ചാര-
ത്തെത്തി,ക്കുനിഞ്ഞിരുന്നുഞാന്‍ 
കൈകളുംമുഖവുംസ്നേഹ-
വായ്പോടെ ,ത്തഴുകീടവേ

ഒരുമാത്ര,ഞാന്‍ ശങ്കിച്ചൂ 
താഴത്തെന്തോകിടപ്പതായ് 
വഴുതിപ്പോയ്കയ്യില്‍നിന്നാ 
റേഷന്‍കാര്‍ഡാണുനിശ്ചയം 

ഒന്നാംപേജില്‍പതിഞ്ഞുള്ള 
ചിത്രംകാണ്‍കെ,യറിഞ്ഞുഞാന്‍ 
തരുണീമണിമോഹിച്ചു
വീണീടാനുള്ളകാരണം 

"മോഹിനീരൂപവുംവിട്ടു-
വന്നതാടകയെന്നപോല്‍
ഗോപമന്ദിരവാതുക്കല്‍ 
നിന്നപൂതനയെന്നപോല്‍"
എത്രയുംഭംഗിചേര്‍ന്നേറെ-
ശ്ശോഭവാച്ചീടുമാനനം 
ഇത്രഭീകരമായ് "ചെയ്ത"
ചാതുര്യത്തെ നമിച്ചിടാം

*************************